خیبرپختونخوا کے ضلع کرک میں جمعے کو پولیس کے ایک آپریشن کے دوران دو مشتبہ شدت پسندوں کے مارے جانے کی اطلاع ہے۔ یہ کارروائی تھانہ خرم محمدزئی کی حدود میں بہادر خیل کے علاقے چارپارہ میں کی گئی۔
ذرائع کے مطابق ابتدائی اطلاعات یہ ہیں کہ پولیس نے ایک مقامی شخص کے گھر پر کارروائی کی جہاں مشتبہ شدت پسندوں کے چھپے ہونے کا شبہ تھا۔ بتایا گیا ہے کہ سکیورٹی اہلکاروں کا آپریشن علاقے میں جاری ہے، جبکہ دیگر مشتبہ افراد قریبی پہاڑی علاقوں کی جانب فرار ہو گئے۔
مارے جانے والوں کی شناخت اور آپریشن کے حالات کی آزادانہ تصدیق نہیں ہو سکی، اور پولیس کی جانب سے تاحال کوئی باضابطہ بیان سامنے نہیں آیا۔ کرک گزشتہ دنوں سے شدت پسندی کے واقعات کی زد میں ہے، جہاں بدھ کی رات ایک جھڑپ میں سی ٹی ڈی کے ایک ڈی ایس پی اور ایک ایس ایچ او جان سے گئے تھے۔