شادی کی خوشیاں جمعرات کو اس وقت ماتم میں بدل گئیں جب پشاور کے نواحی علاقے بڈھ بیر میں باراتیوں کو لے جانے والی ایک بس ٹریکٹر ٹرالی سے ٹکرا گئی۔ ریسکیو 1122 کے مطابق حادثے میں دو بچے جاں بحق جبکہ خواتین اور بچوں سمیت 13 افراد زخمی ہو گئے۔
ریسکیو 1122 کا کہنا ہے کہ اطلاع ملتے ہی پشاور کنٹرول روم سے چار ایمبولینسیں اور طبی ٹیمیں موقع پر روانہ کی گئیں۔ ترجمان بلال احمد فیضی کے مطابق امدادی اہلکاروں نے جائے حادثہ پر 15 زخمیوں کو ابتدائی طبی امداد دی، جن میں سے خواتین اور بچوں سمیت آٹھ افراد کو مزید علاج کے لیے ہسپتال منتقل کیا گیا۔
ابتدائی معلومات کے مطابق ہسپتال پہنچائے گئے زخمیوں میں سے دو بچوں کی موت کی تصدیق ڈاکٹر نے کی۔ ریسکیو حکام نے جاں بحق بچوں کی شناخت یا تصادم کی وجوہات کے بارے میں مزید تفصیل جاری نہیں کی، جبکہ امدادی کارروائیاں جاری ہیں۔